Корисничка поддршка:
Македонски English

„ОДАЈА НА РАДОСТА“ И „100 х 100“ НА САЕМОТ НА КНИГАТА

by Kristina Velevska | No comments yet. | 218 views on this post

„Антолог“ – Скопје го најавува своето саемско претставување

 

„ОДАЈА НА РАДОСТА“ И „100 х 100“

НА САЕМОТ НА КНИГАТА

3 април 2017, Скопје – Со огромно задоволство ве информираме дека како и претходните, така и оваа година, „Антолог“ креира посебно искуство од своето претставување на најголемата книжевна манифестација во Македонија – Саемот на книгата, кој ќе се одржи од 4 до 10 април 2017 година. „Антолог“ ќе се претстави со два изложбени штанда со два одделни пакети на активности и настани на Скопскиот саем.

Инспириран од годинашниот слоган Испишуваме радости!, штандот во „Метрополис арена“ (хала 1) ќе биде своевидна ОДАЈА НА РАДОСТА со претставување на најновите изданија и на најпродаваните наслови, како и со оригиналната серија аксесоари за инспирација и за уживање во читањето. Меѓу најновите изданија ги издвојуваме:

  1. Круг – Дејв Егерс – ексклузивно на македонски бестселерот според кој е снимен истоимениот блокбастер, со Ема Вотсон и Том Хенкс во главните улоги, чија премиера е најавена за 28 април
  2. Пат кон бескрајот – Џејн Хокинг – биографска приказна на еден од најгенијалните умови на сите времиња – Стивен Хокинг, раскажана лично од неговата прва жена, Џејн Хокинг
  3. Последниот ритуал – Ирса Сигурдардотир – мрачен, длабок роман, кој предизвика меѓународна сензација и е објавен во триесетина земји
  4. Магионичар – Магдалена Парис – политички трилер во кој станува збор за операција во која Штази наредувала убиства на граѓани во времето на Железната завеса

Како и домашните:

  1. Штраке-штруке – Александар Кујунџиски – нова поетска книга од најплодниот македонски писател за деца
  2. Се гледаме наскоро. Е. – Д. Евтимова и В. Лукаш – авангарден роман, напишан во форма на размена на електронска пошта
  3. дедикар икарал – Ѓоко Здравески – четвртата поетска збирка на омилениот поет на сите генерации
  4. Се буди ѕверот – Велко Неделковски – трагикомична полифонична сага за животот на неколку наши (пост)транзициски фамилии

Во однос на програмските активности, остануваме доследни на традицијата „секој ден нова приказна“, па годинашната програма изгледа вака:  

 

4 април, вторник

ТАЈНАТА НА ЛАВИРИНТОТ

Првите два дела од научнофантастичната сага ЛавиринтотНевозможно бегство и Бегство низ Пустошот од Џејмс Дашнер, тинејџерски мегахит што го освои светот и како книжевно дело и како филмско остварување, ексклузивно во превод на македонски само во издание на „Антолог“. Подаруваме торбичка за секој купен пакет, а имаме и специјален попуст за оние што ќе успеат да ја решат „тајната на Лавиринтот“.

На првиот саемски ден во Промотивниот центар, со почеток во 19 часот, ќе се одржи и промоција на книгата Рашомон – државен непријател од Ставре Џиков и Марјан Иваноски. Модератор на промоцијата ќе биде Ленче Смилевска, а промотори Гроздан Цветковски и Филип Бачков.

 

5 април, среда

ДЕН НА ТРИЛЕРИТЕ

Промоција на одличните, веќе познати, но и нови трилери во издание на „Антолог“ и специјален пакет „Трилери“, за кој подаруваме шолја за топли кафиња и чаеви со омилените страници. Особено ви ги препорачуваме безвременскиот Смила го чувствува снегот од Петер Хег, непредвидливиот Кој се плаши од волкот од Карин Фосум, возбудливиот Бавната смрт на Лусијана Б. од Гилјермо Мартинес, егзотичниот Мрачен мотив од Луиз Пени, хумористичниот Само еден труп повеќе од Рамиро Пиниља и возбудливиот Последниот ритуал од Ирса Сигурдардотир.

 

6 април, четврток

ЕВРОПСКА ПРИКАЗНА

Промоција на дел од книгите добитнички на Европската награда за литература, меѓу кои еден од нашите најчитани – Холандска девица од Маренте де Мор, но и новообјавените Историја на светлината од Јан Њемец и Сочувство од Дулсе Марија Кардозо. За секој купен пакет „Европски ѕвезди“ подаруваме нотес „Испишуваме радости“.

 

7 април, петок

ДЕН НА ЛИТЕРАТУРАТА ЗА ДЕЦА

Овој саемски ден е посветен на најмалите. Во нашата продукција литературата за деца зазема посебно место со одличните книги од докажаните писатели за деца. Организираме средби со писатели со најубавите посвети, а секој купувач ќе може да си одбере гратис разделници.

 

8 април, сабота

ДЕН НА МАКЕДОНСКАТА ЛИТЕРАТУРА

На штандот на „Антолог“ гостуваат и ќе потпишуваат книги 10 домашни писатели: Јусуф Сулејман, Велко Неделковски, Сања Стојанова, Лидија Давидовска, Моника Трајковска, Д.А. Лори, Ѓоко Здравески, Емил Калешковски, Лилјана Пецова-Илиеска и Игор Станојоски.

 

9 април, недела

РОДЕН ДЕН!

Неделно организираме 10-часовна забава во чест на 18 ГОДИНИ од постоењето на издавачката куќа „Антолог“. Ви најавуваме многу изненадувања и подарок за секој купувач!

 

10 април, понеделник

ДЕН НА ЉУБОВТА

Последниот саемски ден го посветуваме на љубовта. За секој купен пакет „Љубов“ ви подаруваме „антологиско“ вино за многу романтични моменти, а во Одајата на радоста во 12 часот ќе гостува Бојана Цветкова, авторка на Книга подарок за посебна дама како тебе, која по неполни два месеца од објавувањето ќе го потпишува второто издание од оваа книга.

Како и лани, и оваа година овој штанд на „Антолог“ ќе биде мало уметничко дело. Лани ја почнавме таа убава практика македонските дијзанери и уметници да создадат уникатно и креативно искуство од изложбениот простор. Годинава, пак, во соработка со креативното студио Тиноски, кое стои и зад нашата нова линија брендирани производи: обични и магнетни разделници, нотеси, шолји, торбички, подлошки за чаши, беџови, ќе ја обликуваме идејата „одаја на радоста“.

Штандот 100 х 100 на „Антолог“ во 2 хала ги нуди најголемите попусти досега. Читателите таму ќе може да ги одберат своите омилени наслови меѓу стоте книги по цена од сто денари и уште голем број други наслови пред сè за деца и тинејџери, но и за возрасни и за сите други генерации читатели зависни од книги – со вистински попусти до 70%. Целта на оваа акција е буквално секој купувач да може да одбере што повеќе квалитетни наслови во согласност со потребите и можностите.

Не пропуштајте да го разлистате и нашиот најнов каталог и да дојдете заедно да испишеме нови животни и книжевни страници.

 

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!