Корисничка поддршка:
Македонски English

ОБЈАВЕНА ТЕМАТСКАТА ЗБИРКА „ТИВКА АНЕСТЕЗИЈА“

by Kristina Velevska | No comments yet. | 235 views on this post

ОБЈАВЕНА ТЕМАТСКАТА ЗБИРКА „ТИВКА АНЕСТЕЗИЈА“           

 

28 декември 2016, Скопје – Издавачката куќа „Антолог“ од Скопје со големо задоволство го најавува објавувањето на „Тивка анестезија; за болката на другите“, тематска збирка во која се објавени 14 раскази специјално напишани за оваа книга. Приредувач на збирката е писателот Владимир Јанковски.

                                      

Во општество и време во кое поединецот станува сè повеќе анестезиран од чувството на емпатија и можноста да го доживее страдањето на различните, 14 писателки и писатели се обидуваат да одговорат на прашањето каков е нашиот однос кон „болката на другиот“. Една од намерите на книгата е и да им даде глас на луѓето што се наоѓаат на маргините во општеството, живеат живот на аутсајдери или на обесправени поединци, луѓе чиј глас е замолчен.   

„Книгата има доминантна генерациска нишка. Тивка анестезија; за болката на другите почна како еден вид мала книжевна игра во која се обидов на дваесетина писатели блиски до мојата година на раѓање да им понудам сите заедно да напишеме книга на иста тема. Речиси сите го прифатија предлогот. Секако, во идеалната верзија на книгата, таа би требало да вклучи уште неколку автори – некои од нив поканети, но некои од нив и изоставени без лоша намера. Сепак, верувам дека генерациската нишка (разликата меѓу писателите родени во 1974 и оние од 1987 е околу 13 години, што од гледна точка на историјата на книжевноста е минорна и речиси невидлива) е силно присутна. Иако книгата во никој случај нема намера да каже дека во неа се застапени сите главни автори од споменатата генерација. За љубителите на вонкнижевните тривијални податоци и случајни симетрии, можеби интересно е да се додаде дека седум женски и седум машки автори еднакво ја делат сцената“, пишува Јанковски во предговорот кон книгата.

Инаку, покрај приредувачот Владимир Јанковски, во книгата се застапени авторите: Николина Андова Шопова, Петар Андоновски, Игор Анѓелков, Јулијана Величковска, Живко Грозданоски, Жарко Кујунџиски, Калина Малеска, Владимир Мартиновски, Снежана Младеновска Анѓелков, Фросина Пармаковска, Олгица Станковска, Давор Стојановски и Фросина Стојковска.

Книгата е објавена со финансиска поддршка од Министерството за култура на Република Македонија, а авторскиот надомест за објавувањето ќе биде даден во добротворни цели.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!