Корисничка поддршка:
Македонски English

Гаргара со вино за топла зима

by Kristina Velevska | No comments yet. | 244 views on this post

КНИГА СО ВИНО ЗА ТОПЛА ЗИМА - ПРОМОЦИЈА НА ВТОРОТО ИЗДАНИЕ НА „ГАРГАРА“       

 

21 декември 2016, Скопје – Издавачката куќа „Антолог“ од Скопје со големо задоволство ја најавува промоцијата на второто издание на романот Гаргара од Игор Станојоски, која ќе се одржи утре, 21 декември 2016 година, во кафулето „Децата од нашата улица“ на ул. „Аминта Трети“ бр. 29, со почеток во 20 часот. Промотори на делото ќе бидат книжевните проследувачи и писатели Душко Крстевски и Оливера Ќорвезироска. За вистинско стоплување во овие студени претпразнични денови, виното и романот на промоцијата ќе се продаваат по намалена цена.

Во 2004 година, непосредно пред Портокаловата револуција, Орест, главниот лик во романот, отвора подземно кафуле во западноукраинскиот град Лавов. Го нарекува Гаргара, според името на кафулето што постоело во 1963 година на истото место. Старото кафуле во 1963 година исчезнало под неразјаснети околности. Од него останала само Книгата за пофалби и поплаки, која содржи два автобиографски раскази. Орест заедно со својата пријателка тргнува во ризична потрага по авторите на расказите во Книгата за пофалби и поплаки и истовремено се обидува да го расветли мистериозното исчезнување на кафулето во 1963 година.

„Ваков роман се дочекува на нозе ... Јазикот му ’спие‘ во стилот, стилот му ’спие‘ во структурата, структурата му ’спие‘ во одлично изведениот роман“, напиша Оливера Ќорвезироска во својата книга „Еден текст и една жена“.

„Се чита полека, му се восхитуваш, му се радуваш како мало дете ... Настаните се толку динамични, толку возбудливи ... а описите се како врвно сценарио од филм“, вели за романот Александар Алексов.

„Игор Станојоски влегува суверено во шумата на македонскиот роман со неверојатен арсенал на јазичка и политичка археологија на сеќавања...“, е ставот на Јордан Плевнеш.

„Постојано виси прашањето што ќе се случи, или каде води ова, прашања што цело време ве тераат напред и назад, прашања што на крајот се многу вешто решени...“, пишува Фросина Пармаковска.

Игор Станојоски е македонски лингвист и романсиер. Роден е во Копенхаген, но поголемиот дел од животот го минува во татковината. Дипломира во Скопје на Филолошкиот факултет „Блаже Конески“ на групата Македонски јазик со општа и компаративна книжевност. Работел на универзитетите во Лавов (Украина), Катовице (Полска), Брно (Чешка). Докторирал во Полска во 2009 година. Автор е на повеќе книги од областа на лингвистиката, како и на романите Гаргара (2014) и Првиот универзитетски ден на мојата ќерка (2016).

Иако првпат објавен пред две години, ова ќе биде прва промоција на романот Гаргара во Скопје.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!