Корисничка поддршка:
Македонски English

НОВА ПАТОПИСНО-МОНОГРАФСКА КНИГА И ДВЕ ПРОМОЦИИ ОД „АНТОЛОГ“ ОВАА НЕДЕЛА

by Kristina Velevska | No comments yet. | 252 views on this post

НОВА ПАТОПИСНО-МОНОГРАФСКА КНИГА И ДВЕ ПРОМОЦИИ ОД „АНТОЛОГ“ ОВАА НЕДЕЛА  

 

29 ноември 2016, Скопје – Издавачката куќа „Антолог“ од Скопје со големо задоволство ве информира за објавувањето на патописно-монографската збирка Под Добра Вода од македонскиот писател Саво Костадиновски, во која како рецензент и автор на патописниот дел се јавува Александар Кујунџиски. Иако посветена пред сè на селото Горно Ботуше, родното село на писателот Саво Костадиновски, во оваа книга се отсликани и многу други места, настани и луѓе од поречкиот регион.

                                                                        

Појавата на книгата Под Добра Вода од Саво Костадиновски, објавена во едицијата „Громови“ на „Антолог“, е значајна не само за областа Порече под планината Добра Вода туку и за сите други краеви од Република Македонија, за сите оние со корени и спомени од под околината на планината со најпоетично име на светот. Ова издание, кое донесува една мозаична концепција (со патописно-монографски и поетски целинки), закитено со впечатливи стари и новоснимени фотозаписи, дарува и пораки преполни љубов и сончевина.

 

Оваа недела ќе се одржат и две промоции на книги од „Антолог“.

                                                                              

В четврток, 1 декември, во Градската библиотека „Браќа Миладиновци“ во Скопје, со почеток во 12 часот, ќе биде промовирана поетската збирка Зборот е светлина од Ленче Милошевска. Промоторка на збирката ќе биде поетесата Виолета Танчева-Златева, а актерска придружба младиот Теоман Максут.

Ленче Милошевска е современа македонска поетеса, авторка на четири книги поезија и на четири романи, а оваа нејзина збирка, чиј наслов ја симболизира творечката синергија што произлегува од логосот и светлината, е производ на искуство, поетска зрелост и успешна постапка во одбирот на поетските дилеми, предизвици и тишини.

                                                                                

Истиот ден, во Библиотеката „Гоце Делчев“ во Штип, исто така во 12 часот, ќе биде промовирана книгата Ова е моето последно молчење, со поднаслов Панорама на актуелни современи македонски поетеси. Книгата ќе ја претстават приредувачките Елена Пренџова и Оливера Доцевска и рецензентката Весна Мојсова-Чепишевска.

Ова е моето последно молчење има цел да ги претстави современите македонски поетеси што активно творат од почетокот на новиов век. Станува збор за панорамски преглед со избор од неколку песни што најдобро ќе го претстават личниот севкупен поетски печат на авторките, од поетеси од различни генерации, активни на сцената со по неколку објавени авторски книги поезија на македонски јазик.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!