Корисничка поддршка:
Македонски English

BOOKSTAR, ПРВ ФЕСТИВАЛ НА ЕВРОПСКАТА ЛИТЕРАТУРА

by Kristina Velevska | No comments yet. | 955 views on this post

 КНИЖЕВНИ ЅВЕЗДИ НА „BOOKSTAR“ - ПРВИОТ ФЕСТИВАЛ НА ЕВРОПСКАТА ЛИТЕРАТУРА

 

7 октомври 2015, Скопје - Издавачката куќа „Антолог“ од Скопје со големо задоволство го најавува „BookStar“ - првиот фестивал на европската литература во Македонија. Во рамките на оваа манифестација, која ќе трае до крајот на октомври, ќе се одржат Саемот на европската литература, гостувања на странски и на домашни автори, неколку промоции и други интересни настани и содржини поместени во пет програмски целини.

- Во последните години интересот на македонските читатели за литературата од писатели од Европа е очигледно зголемен, па имаме голем број нови преводи на класици, но и на еминентни и наградувани дела од современата европска литература. Периодов бележиме и редица промоции и гостувања на автори, така што сметавме дека тој нагорен тренд за европската литература и кон литературата воопшто треба да го поддржиме. Особено е важно тоа што и Македонија и македонските автори природно припаѓаат на ова книжевно семејство, бидејќи во „Антолог“ на европската литература гледаме во поширок, естетско-креативен, а не само географско-политички контекст, така што тука ќе се најдат и автори и дела од Балканот, Швајцарија, Русија, Турција итн. Поради фактот дека ѕвездите како симбол се асоцијација за Европа, а и поради тоа што во Македонија ќе ги поканиме најголемите имиња на европската литература, се решивме името на фестивалот да ги обединува токму литературата и ѕвездите - велат од книгоиздателството.

                                                                     

Главна програма

Во фокусот на фестивалот „BookStar“, односно „Книжевните ѕвезди“, ќе бидат гостувањата на авторите и промоциите на нивните дела. Годинава во Македонија се најавени важни имиња на европската и на светската уметност на пишаниот збор.

Имено, романот „Обескостена“ од белгиската писателка Изабел Вери, добитничка на Европската книжевна награда во 2013 година, ќе биде промовиран на 10 октомври во фоајето на киното „Фросина“ при МКЦ со почеток во 20 часот, со присуство на авторката. Преводот на книгата е на Маргарита Терзијан-Маленкова.

Романот „18% сиво“ од бугарскиот писател Захари Карабашлиев ќе биде промовиран на 22 октомври во галеријата при МКЦ со почеток во 20 часот, со присуство на авторот. Преводот на книгата е на Душко Крстевски.

Двете книги се објавени со поддршка на програмата „Креативна Европа“ на Европската Унија.

Саем на европската литература

Фестивалот „BookStar“ ќе биде главен книжевен настан на издавачката куќа „Антолог“ и традиционално ќе се одржува во месецот на книгата. Затоа, во рамките на фестивалот на европската литература, цел октомври во Книжевниот центар „Антолог“ ќе се случува големиот Саем на европската литература, при што сите книги од европски автори ќе се продаваат со специјален попуст од 20-50%. Со други зборови, голем дел од книгите од едицијата „Бранови“, која досега се покажа како омилена кај читателската публика, ќе може да се купат по речиси половина од редовната цена.

                                        

Македонска поддршка

Секоја година во рамките на фестивалот ќе биде промовиран и одреден македонски автор преку програмата „Македонска поддршка“ со цел да се прикаже богатата продукција на македонската книжевност. Годинава честа е на младата поетеса и новинарка Биљана Стојановска и на нејзината книга „Зборовите немаат значење“. Книгата ќе биде промовирана во фоајето на киното „Фросина“ на 13 октомври од 20 часот.

Лично авторот!

За да можат читателите одблизу да ги запознаат авторите во порелаксирано опкружување, во новоотворениот Книжевен центар „Антолог“ ќе се одржува програмата „Лично авторот!“ Читателите ќе имаат можност лично да земат потпис и да поразговараат со Изабел Вери на 10 октомври од 10 часот, додека средбата со Захари Карабашлиев е на 24 октомври на истото место, исто така со почеток во 10 часот.

Дај две, љубовни!

На 27 октомври во Клубот МКЦ со почеток од 20 часот е закажана концертна промоција на антологијата на најубавите љубовни песни на авторите од Европа насловена „Дај две, љубовни!“ Освен поетското читање на вклучените автори и преведувачи, како забава по повод затворањето на фестивалот „BookStar“ е предвиден конертен настап на групата „Фолтин“.

Фестивалот е поддржан од програмата „Културни приказни“ и од Европската Унија. Логистичката поддршка е на Младинскиот културен центар. Како интернационална манифестација, името на „Книжевни ѕвезди“ ќе биде во неговата англиска верзија, „BookStar“.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!