Корисничка поддршка:
Македонски English

ПРОМОЦИЈА НА РОМАНОТ „ХОЛАНДСКА ДЕВИЦА“ ОД МАРЕНТЕ ДЕ МОР

by Kristina Velevska | No comments yet. | 227 views on this post

ОТВОРАЊЕ НА „БУКСТАР“ 2016 – СО ДОБИТНИЧКА НА ЕВРОПСКАТА КНИЖЕВНА НАГРАДА

 

24 октомври 2016, Скопје – Организацискиот тим на Фестивалот на европската книжевност „BookStar“со големо задоволство го најавува отворањето на второто издание на фестивалот со гостувањето на холандската писателка Маренте де Мор. Денеска, 24 октомври 2016 година, со почеток во 20 часот, во Јавна соба ќе биде промовиран нејзиниот роман „Холандска девица“, издание на „Антолог“, кој на македонски јазик го приопшти Ели Пујовска. Книгата е објавена со поддршка на програмата „Креативна Европа“ на Европската Унија и на Министерството за култура на Република Македонија.

Романот е добитник на Европската книжевна награда во 2014 година, а ќе го промовира писателот и литературен критичар Александар Прокопиев. Делови од романот, заедно со Маренте де Мор, ќе чита Елена Стојановска, која ќе биде и водител на настанот. По промоцијата следува журка со настап на The Hounds, млад алтернативен бенд од Прилеп.

„Холандска девица“ е преведен на 10 јазици, а зборува за едно возбудливо лето во кое 18-годишната Јана ќе тргне сама на енигматично патување во Германија. Татко ѝ ја испраќа кај Егон фон Бетихер, кој треба да ја научи да мечува. Егон е мистериозна личност, но и магнетичен шармер. И Јана едноставно не може да одолее. Но оваа прекрасна книга не е само книга за љубовта и за губењето на невиноста. Лошо е што сме во 1936 година. Пред Јана се отвора светот на возрасните, полн со прашања и со спротивности. Во нејзините очи се судираат стариот хероизам на аристократската класа и варварството што надоаѓа со ширењето на нацизмот. На раб од големиот историски пресврт на Втората светска војна, Јана ќе доживее индивидуална промена по која нема враќање. Дали ова патување е во еден правец?

Авторката на романот, Маренте де Мор, има објавено три романи, како и книги со колумни и со кратки раскази. Студирала словенски јазици. Во 1990-тите живеела во Русија, пишувајќи за холандски и за руски медиуми. Со авторско дело дебитирала во 2007 година. Од 2009 работи како колумнист во списание за политика.

Читателите ќе имаат поголема можност да ја запознаат авторката одблиску и дента на 24 октомври во Книжевниот центар „Антолог“, со почеток во 11 часот, кога ќе се одржи Книжевното кафе на кое таа ќе потпишува книги и со кафе и колачиња ќе ја запознае својата публика во Македонија.

Фестивалот „BookStar“ е поддржан од Европската Унија, Министерството за култура на Република Македонија, Амбасадите на Кралството Холандија и на Република Полска. Логистичката поддршка е на Јавна соба.

Ве очекуваме во светот на уметноста од 24 октомври до 11 ноември.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!