Корисничка поддршка:
Македонски English

ОБЈАВЕНА ЗБИРКАТА „СОБАТА ВО ПЛАМЕН“ ОД АЛВИН ПАНГ

by Kristina Velevska | No comments yet. | 427 views on this post

НАЈПРЕВЕДУВАНИОТ СОВРЕМЕН ПОЕТ ОД СИНГАПУР ОБЈАВЕН И НА МАКЕДОНСКИ

           

8 февруари 2016, Скопје – Издавачката куќа „Антолог“ од Скопје со големо задоволство го најавува објавувањето на поетската збирка „Собата во пламен“, избор од поезијата на сингапурскиот поет Алвин Панг. Препевот на македонски е на Македонка Божиновска. Книгата е објавена со поддршка на Националниот совет за уметност од Сингапур и на Министерството за култура на Република Македонија.

Алвин Панг важи за најпреведуваниот современ поет од Сингапур. Неговата поезија е преведена на дваесетина јазици и објавувана во Европа, во Азија и во Америка. Универзалноста и повеќеслојноста на неговиот поетскиот јазик ја надминуваат локалната семантика на секојдневјето – Алвин Панг не е типичен азиски поет што тешко се разделува од наследените канонски форми и мотиви. Тој е поет на тишината и на невидливите градови – и самиот честопати ги гради стиховите врз текстурата и мисловноста на Калвино и на Махмуд Дарвиш, или врз сликовитата соновност на Рене Магрит. Редакцијата на песните на македонски ја направи Никола Маџиров.

                                                                 

„Алвин Панг воопшто не беше преведуван во Македонија и затоа сметаме дека заслужува антологиско претставување преку избор поезија што ќе ги содржи стиховите од неговите објавени книги: Testing the Silence (Испробување на тишината, 1997), City of Rain (Град на дождот, 2003), Other Things (Други нешта, 2006) и What Gives Us Our Names (Што ни ги дава имињата, 2011). Многупати е прогласуван за уметник на годината во Сингапур, а бил дел и од најзначајните светски книжевни резиденции и настани, како што се Меѓународната програма за пишување (IWP – International Writing Program) на Универзитетот во Ајова или Поетскиот Парнас во Лондон. Со преводот на оваа книга ќе се збогати сиромашниот книжевен фонд на азиската современа литература преведена на македонски јазик“, соопштуваат од „Антолог“.

Алвин Панг (роден 1972 во Сингапур) е поет, писател, уредник и преведувач. Вклучен е во Оксфордската збирка на модерна поезија на англиски (второ издание, 2013) и редовно се појавува на поголеми фестивали и во публикации насекаде во светот. Тој го води и Литературниот центар во Сингапур, непрофитна интеркултурна иницијатива. Именуван е за Млад уметник на Сингапур за литература во 2005 година и го има добиено признанието „Младинска награда на Сингапур“ за уметност и за култура во 2007 година. 

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!