Корисничка поддршка:
Македонски English

Објавена книгата за деца „Голманката и морето“ од Марија Пар

by Kristina Velevska | No comments yet. | 481 views on this post

1 април 2020

 

Антолог ве повикува на првоаприлски предизвик – направи фотографија со маска и стани добитник на книгата

 

ГОЛМАНКАТА И МОРЕТО

од норвешката авторка Марија Пар

 

Издавачката куќа „Антолог“ ги повикува сите деца на возраст до 12 години на првоаприлски предизвик. Иако сите сме дома и во изолација, можеме да се забавуваме и да се маскираме како и секој Први април досега. За таа цел, „Антолог“ најавува предизвик на социјалните мрежи, кој ќе трае до 5 април. Идејата е родителите да објавуваат фотографии од своите маскирани дечиња користејќи го хаштагот #маскавоизолација. Другите правила за учество ќе бидат објавени на профилите на „Антолог“, а најдобрата маска ќе биде избрана на 6 април и наградена со нашето најново издание за деца – книгата „Голманката и морето“ од норвешката авторка Марија Пар.

„Голманката и морето“ е всушност долгоочекуваното продолжение на „Вафли во форма на срце“ од авторката што не залудно ја нарекуваат „новата Астрид Линдгрен“. Сега Триле и Лена имаат 12 години и тргнуваат во авантури што се многу посериозни и многу поопасни. Во нивното одделение се појавува ново девојче – Биргита од Нидерланд, која кај Триле предизвикува дотогаш непознати емоции.

Во исто време, над фудбалската кариера на Лена се надвиснуваат темни облаци. Новиот тренер не ѝ дава шанса да се развива како голманка и таа ќе мора да се пресели во друг тим. Палавата Лена ќе го натера својот пријател Триле повторно да тргнат во уште една неразумна авантура – со импровизиран сплав ќе испловат кон немирното море. Влегувајќи во светот на возрасните, Лена и Триле сфаќаат дека им претстојат многу повеќе одговорности.

Внимавајте! На сопствена одговорност јавате на бранови од солзи и смеа.

Марија Пар е исклучителна авторка на книги за деца од Норвешка. Нејзиниот прв роман, „Вафли во форма на срце“, е преведен на повеќе од дваесет и пет јазици и ги освои книжевните награди: „Сорсиер“ (Франција) во 2010 година, „Зилферен хрифел“ (Нидерланд) во 2008 година и влезе во потесен избор за добивање на престижната награда „Браге“ (Норвешка). Воедно, според книгата е снимена популарна телевизиска серија за деца на најгледаниот ТВ-канал во Норвешка, а се направени и неколку театарски претстави. Нејзиниот втор роман, „Toње Глимердал“, ја доби норвешката книжевна награда „Браге“, како и „Критикс прајз“ во 2009 година. Марија Пар е магистер по нордиски јазици и книжевност и работи како наставник во основно училиште. Живее во Норвешка со своето семејство.

Македонското издание на книгата е преведено од Искра Бадева, графички уредено од Марко Трпески, а финансиски поддржано од програмата Креативна Европа на Европската Унија.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!