Корисничка поддршка:
Македонски English

BOOKSTAR 2019 под слоганот „Отаде“

by Kristina Velevska | No comments yet. | 71 views on this post

3 октомври 2019

 

Од 7 до 10 октомври „Антолог“ најавува

 

BOOKSTAR 2019

под слоганот „Отаде“

Издавачката куќа „Антолог“ од Скопје со огромно задоволство го најавува петтото издание на Фестивалот на европската литература „BookStar“ / „Книжевни ѕвезди“, кој ќе се одржи од 7 до 10 октомври 2019 година. Под слоганот Отаде, Фестивалот оваа година го поставува прашањето: Што се наоѓа отаде сивата магливост по слушнатите приказни на црната и белата страна? Како секоја така и оваа година, организаторите ќе се обидат преку книжевноста да ги објаснат културолошките промени. Фестивалот „BookStar“ е од социјално ангажиран карактер и негова цел е да разбранува интерес кај пошироката јавност, нудејќи содржина што помага полесно да се разберат проблемите со кои се соочува општеството денес.

Различностите надвладуваат, па оваа година пред македонската публика ќе бидат претставени шест автори со спротивни заднини, тематики и интереси: Халдора Тородсен (Исланд), Михал Вивег (Чешка), Кадер Абдолах (Холандија), Евгениј Водолазкин (Русија), Слободан Шнајдер (Хрватска) и Марко Шелиќ Марчело (Србија) – кои ќе се обединат и заедно ќе дискутираат на темите опфатени во нивните романи: религија, националност, традиција, политика, сексуалност и вечно присутната желба за моќ. Отаде шизоидните наративи во секојдневјето, постојат личните приказни, кои најдобро сведочат за хаосот на идеологиите.

Дизајнот на официјалниот фестивалски постер и на другите промотивни материјали е на Јана Андева, а настанот е организиран во соработка со Младинскиот културен центар, каде што ќе се одржат фестивалските настани.

Во прилог следува целата фестивалска програма.

 

ГЛАВНА ПРОГРАМА

Во фокусот на фестивалот и оваа година ќе бидат гостувањата на авторите и промоциите на нивните дела.

 

7 октомври

„BookStar 2019“ ќе биде отворен на 7 октомври, со почеток во 19 часот, со поздравна реч на Н.Е. Самуел Жбогар, амбасадор на Европската Унија во Република С. Македонија.

Веднаш потоа ќе биде претставена и првата гостинка на Фестивалот, Халдора Тородсен од Исланд, и ќе биде промовиран нејзиниот роман Двојно стакло, добитник на Европската награда за книжевност во 2017 година. Книгата ќе ја промовира Ана Мартиноска.

По неа ќе биде промовиран романот Воспитувањето девојки во Чешка од гостинот од Чешка, Михал Вивег. Неговиот роман ќе го промовира Јасна Котеска.

Модераторка на двата настана ќе биде Ана Василева.

 

8 октомври

На 8 октомври, со почеток во 19 часот, ќе бидат претставени книгите Бележникот на татко ми и Куќата на џамијата од авторот Кадер Абдолах од Холандија. Книгите ќе ги промовира Мерсиха Исмајлоска.

По оваа промоција ќе бидат претставени и книгите Лавр, Соловјов и Ларионов и Авијатичарот од гостинот од Русија, Евгениј Водолазкин. Промотор на неговите книги ќе биде Венко Андоновски. Водолазкин е и годинашниот добитник на наградата „BookStar“ за книгата Авијатичарот, која ќе му биде доделена на последниот фестивалски ден.

Модератор на овие два настана е Ана Јовковска.

 

9 октомври

На 9 октомври ќе има уште две промоции, а оваа вечер е резервирана за балканските автори.

Со почеток во 19 часот ќе биде промовиран романот Исцелување на светот од Слободан Шанјдер од Хрватска. Промотор на романот ќе биде Ана Стојаноска, а на публиката ќе ѝ се обрати и Владимир Милчин. Извадок од романот ќе прочита Сузана Киранџиска.

По овој настан следува промоцијата на романот Малтерего од гостинот од Србија, Марко Шелиќ Марчело. Романот ќе го промовираат Ѓоко Здравески и Иван Шопов.

 

Сите промоции ќе се одржат во киното „Фросина“ при МКЦ.

 

СПЕЦИЈАЛНИ НАСТАНИ

 

Книжевни дискусии

Во соработка со Друштвото на писателите на Македонија, ќе бидат организирани две книжевни дискусии на кои ќе присуствуваат дел од авторите гости заедно со македонски претставници од светот на книжевноста.

На 8 октомври во 17 часот двајца странски (Кадер Абдолах и Михал Вивег) и двајца домашни писатели (Луан Старова и Оливера Ќорвезироска) ќе дискутираат на тема Да се биде европски романописец денес и ќе ги споделат своите искуства во доменот на романескната проза. Модераторка на дискусијата ќе биде Соња Стојменска-Елзесер.

На 9 октомври во 17 часот ќе се одржи книжевната средба Во сенката на читателот, модерирана од Весна Мојсова-Чепишевска, при што своите размисли и ставови ќе ги споделат гостинката Халдора Тородсен и македонските авторки Калина Малеска и Фросина Пармаковска.

 

Работилница со Марко Шелиќ Марчело

Марко Шелиќ Марчело е добропознат на нашата јавност и како писател и како рап-музичар. Но тој исто така со години работи на полето на едукација на младите луѓе од цел Балкан. Одржал огромен број средби и работилници со средношколци и студенти. На Фестивалот „BookStar“ за првпат ќе има можност овој супер кул уметник да настапи и да се дружи со млади луѓе од Македонија! Работилницата ќе се одржи на 8 октомври од 15 часот во BookStar фестивалскиот центар.

 

Поткаст Гол ручек во живо

Поткастот Гол ручек продолжува со Душко Крстевски, познат на книжевната јавност по своите впечатливи настапи како поет и како литературен промотор. За време на „BookStar 2019“, на сцената на култното кино „Фросина“ ќе седнат на жешкото столче четворица европски и македонски писатели, кои имаат што да кажат на многу книжевни и општествени теми: Халдора Тородсен – 8 октомври во 17 часот, Марко Шелиќ Марчело – 8 октомври во 18 часот, Венко Андоновски – 9 октомври во 17 часот и  Евгениј Водолазкин – 9 октомври во 18 часот.

Покрај можноста во живо да се присуствува на снимањето на новите епизоди од првиот книжевен поткаст кај нас, тој ќе биде пренесуван во живот и преку страницата на МКЦ на „Фејсбук“.

 

Саем на европската литература

За цело време додека трае Фестивалот „BookStar“ (7-10 октомври), во BookStar фестивалскиот центар специјално за читателите ќе биде организирано петтото издание на Саемот на европската литература, каде што ќе може да се набават книги добитнички на Европската награда за книжевност и други книги од европски автори по намалени цени. Покрај организаторот „Антолог“, на саемот ќе земат учество уште и „Арт конект“, „Бата прес“, „Бегемот“, „Готен“, „Или-или“, „ПНВ публикации“, „Полица“ и „Три“.

 

Почесно универзитетско предавање

На 10 октомври од 10 часот во Салата за седници на Филолошкиот факултет „Блаже Конески“ во Скопје специјално предавање ќе одржи годинашниот добитник на наградата „BookStar“ – Евгениј Водолазкин. Освен тоа што студентите и гостите ќе можат да поразговараат непосредно со овој голем руски писател и да ги слушнат неговите видувања за романот денес, во оваа пригода ќе биде доделена и наградата „BookStar 2019“ за романот Авијатичарот, со што ќе заврши и официјалниот дел на Фестивалот „BookStar 2019“.

 

Влезот на сите фестивалски настани е бесплатен и вратите се отворени за сите љубители на квалитетната европска литература.

Фестивалот е поддржан од програмата Креативна Европа на Европската Унија, Министерство за култура на Република Македонија, мрежата „Традуки“, Институтот за преводи на Русија, Холандскиот литературен фонд, Амбасадата на Кралството Холандија, Амбасадата на Република Чешка, Исландскиот книжевен центар, Младинскиот културен центар и Друштвото на писатели на Македонија.

Сите фестивалски активности и целосната програма се достапни на официјалниот настан на „Фејсбук“.

 

МАЛ ЈУБИЛЕЈ ЗА BOOKSTAR, АНТОЛОГИСКИ ПОТФАТ ЗА НАС!

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!