Корисничка поддршка:
Македонски English

ПРОМОЦИЈА НА КНИГАТА „ВО СЕНКАТА НА ЗЛОСТОРОТ“ ОД ХЕЛЕНА ХЕНШЕН

by Kristina Velevska | No comments yet. | 16 views on this post

11 септември 2019

 

Издавачката куќа Антолог од Скопје со големо задоволство ја најавува промоцијата на книгата

 

ВО СЕНКАТА НА ЗЛОСТОРОТ

– отворено за кошмарите на семејната историја

 

На 12 септември 2019 година, со почеток во 19 часот, во книжарницата „Антолог“ во Центар ќе биде промовиран романот „Во сенката на злосторот“ од шведската авторка Хелена Хеншен (1940-2011), наградена со Наградата за литература на Европската Унија во 2009 година.

Гостинка на настанот ќе биде ќерката на авторката – Кристина Хеншен, која учествувала во истражувањата што ги правела нејзината мајка при пишувањето на романот, а освен неа ќе настапат и: Ивица Челиковиќ (преведувач), Елизабета Баковска (промотор) и Ана Василева (модератор).

На 7 март 1932 година во познатото шведско семејство Фон Сидов се одвивала крвава драма, која не престанала да го интригира вниманието на јавноста сè до денес. Толкав шок и интерес од пошироката јавност предизвикале само уште убиствата на шведскиот премиер Улоф Палме и на министерката за надворешни работи Ана Линд.

Во Стокхолм студентот по право Фредрик фон Сидов со железна прачка ги убил својот татко Јалмар, окружен судија и претседател на шведското Здружение на работодавците, и нивните две слугинки. Заедно со својата сопруга Софи избегал во хотел во Упсала, каде што, откако ги пронашла полицијата, со пиштол ја застрелал сопругата, а потоа и себеси.

Зошто го направил тоа? Убиствата со години биле главна тема во цела Скандинавија. Срамот на семејството бил голем, тие биле „фини“ и за такви работи не се зборувало јавно. Општествен скандал било најлошото што можело да се случи на некое шведско семејство од повисоката класа.

Убиецот бил вујко на авторката Хелена Хеншен, која имала 15 години кога се случиле бруталните и никогаш докрај разјаснети убиства. Обидувајќи се да го сфати она што мајка ѝ никогаш не можела да ѝ го раскаже, Хеншен со ова дело го прекинала молкот, а како резултат на тоа пред читателите е еден силен и импресивен роман.

„Во сенката на злосторот“ е награден со наградата на читателите на списанието „Ви“ и со Наградата за литература на Европската Унија во 2009 година.

Хелена Хеншен (1940-2011) била шведска писателка, дизајнерка и илустраторка на книги за деца. Основач е на познатата дизајнерска компанија „Ма-Јонг“ од Шведска. Писателската кариера ја започнала во 64-тата година од животот со романот „Во сенката на злосторот“, кој добил високи оценки од критиката и наишол на одличен прием од читателите. Во 2008 година го објавила романот „Таа сакала“, за кој повторно се инспирирала од семејната историја.

 

Македонското издание на книгата е преведено од Ивица Челиковиќ, графички уредено од Марко Трпески, а финансиски поддржано од програмата Креативна Европа на Европската Унија, Министерството за култура на Република Македонија и Шведскиот совет за култура.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!