Корисничка поддршка:
Македонски English

ОБЈАВЕН РОМАНОТ „ПРОСТИ МИ“ ОД ИДА ХЕГАЗИ ХОЈЕР

by Kristina Velevska | No comments yet. | 233 views on this post

„Антолог“ ја објави

„ПРОСТИ МИ“ - ПРИКАЗНА ЗА ДВЕТЕ ЛИЦА НА ЉУБОВТА ОД НОРВЕЖАНКАТА ИДА ХЕГАЗИ ХОЈЕР

11 април 2019, Скопје – Издавачката куќа „Антолог“ од Скопје со големо задоволство го најавува објавувањето на романот „Прости ми“ од норвешката писателка Ида Хегази Хојер. Романот е добитник на Наградата за литература на Европската Унија за 2015 година. Преводот на македонски е на Искра Бадева.

                                                                                  

„Прости ми“ е спонтана љубовна приказна на двајца млади. Приказна за љубовта, но и за тоа како таа згаснува. Парот започнува врска, воопшто не познавајќи се еден со друг. Но она што се случува со текот на времето е премин во мачно секојдневје исполнето со опсесија, сомнежи, болка, кое ги руши границите помеѓу вистината и лагата, сонот и реалноста.

Приказната открива страст, но и репресија и лаги како механизам на промислена самоодбрана. Надежта, соништата за свадба и големото патување на море, копнежот за единство и вечност се задушуваат во сите прикриени вистини, опасни тајни и сомнежи. Реализам што се граничи со апсурдот на сонот и со црниот хумор.

Ида Хегази Хојер нуди ретроспектива на љубовта што е силна и мрачна, радосна и тажна, великодушна и себична, откривајќи ги грубите и ранливи страни на човекот, механизмите на интеракција, како и можноста за помирување. И, кога сè е неповратно, остануваат живиот спомен во крвта, монолог од дното на душата и едно тивко: прости ми...

Книгата е објавена со поддршка на програмата Креативна Европа на Европската Унија, Министерството за култура на Република Македонија и NORLA.

Ида Хегази Хојер (1981) е норвешка писателка со данско-египетско потекло. Студирала социологија. Првиот роман го објавува во 2012 година, а веќе во 2014 година ја добива Бјернсоновата стипендија, која Друштвото на норвешки книжари ја доделува на млади таленти. Следната година норвешкиот неделник „Моргенбладет“ ја сместува меѓу десетте најдобри млади писатели од Норвешка.

 

Искра Бадева е родена во Скопје во 1980 година. Како вљубеник во културата и литературата на северот, ги има завршено студиите по скандинавистика на Софискиот универзитет во 2007 година. Живее и работи во Скопје. Досега има преведено повеќе од дваесет романи од норвешки и од шведски јазик.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!