Корисничка поддршка:
Македонски English

ФРЕДРИК БАКМАН КОНЕЧНО ВО ПРЕВОД НА МАКЕДОНСКИ

by Kristina Velevska | No comments yet. | 304 views on this post

„Антолог“ со гордост најавува

ФРЕДРИК БАКМАН КОНЕЧНО ВО ПРЕВОД НА МАКЕДОНСКИ!

 

14 јануари 2019, Скопје – Издавачката куќа „Антолог“ од Скопје со огромно задоволство го најавува објавувањето на романот „Баба ми ве поздравува и ви се извинува“ од шведскиот мегаактуелен писател Фредрик Бакман. Бакман важи за еден од најчитаните и најпродаваните шведски автори во светот и конечно и македонската публика ќе има можност да ги чита на македонски јазик неговите бестселери што ги освоија читателите со смислата за хумор и оригиналните ликови. Преводот на македонски на оваа негова книга е на Ирена Трајкова.

                                                                                 

„Баба ми ве поздравува и ви се извинува“ е шармантен роман за девојче чија баба умира и остава зад себе серија писма, испраќајќи ја малата внука на патување што го оживува светот на бајките измислен од нив двете. Елса има седум години и е поинаква од своите врснички. Нејзината баба има седумдесет и седум години и е тотално откачена. На пример, има навика од својот балкон да гаѓа непознати луѓе со пејнтбол-топчиња. Две различни, а блиски перспективи. Бабата е најдобрата другарка на Елса. Всушност, единствената другарка.

Ноќе Елса се засолнува во приказните на баба си, во чудесната Земја на речиси будните и во кралството Мијама, каде што сите се поинакви и никој не мора да биде нормален. Кога бабата умира, остава куп писма со кои им се извинува на луѓето на кои им згрешила во животот. Со писмата започнува најголемата авантура на Елса.

Со комична точност и со исцртување сосема нова реалност, Бакман нуди приказна за животот и смртта и за едно од најважните човекови права: правото да се биде различен!

Покрај овој, наскоро во издание на „Антолог“ ќе излезат уште два романи бестселери од Бакман – „Човекот по име Уве“ и „Брит-Мари беше овде“, кои се и филмувани.

Фредрик Бакман (1981) е шведски писател, блогер и колумнист. Неговите книги се продадени во милионски тиражи низ целиот свет, со што станал еден од најпопуларните писатели за сите генерации читатели. Пишува романи проткаени со оригинален хумор и со искрена човечка трогателност. Преведен е во повеќе од четириесет држави. Живее и работи во Стокхолм, со својата сопруга и со двете деца.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!