Корисничка поддршка:
Македонски English

ОБЈАВЕН РОМАНОТ „ИСЦЕЛУВАЊЕ НА СВЕТОТ“ ОД СЛОБОДАН ШНАЈДЕР

by Kristina Velevska | No comments yet. | 123 views on this post

Нови вести од „Антолог“

ОБЈАВЕН „ИСЦЕЛУВАЊЕ НА СВЕТОТ“ – НАЈНАГРАДУВАНИОТ ХРВАТСКИ РОМАН

 

10 декември 2018, Скопје – Издавачката куќа „Антолог“ од Скопје со огромно задоволство го најавува објавувањето на романот „Исцелување на светот“ од хрватскиот писател Слободан Шнајдер. Книгата е најнаградуваниот хрватски роман во последните неколку години. Преводот на македонски е на Владимир Јанковски.

                                                                                      

„Исцелување на светот“ е приказна за животот на двајца луѓе во време на крајности. Георг и Вера во една точка од своите животи имаат екстремно спротивставени биографии. Тие се среќаваат кога тоа станува можно, откако сè на светот било против таа нивна средба. Но потоа заминуваат секој по својот пат, иако сега пак сè ги упатува на тоа да останат заедно.

Станува збор за епска приказна што сведочи за моќта на идеологијата способна да подели речиси сè. Романот го опфаќа периодот од втората половина на XVIII век, кога група германски колонисти пристигнуваат во Славонија, Хрватска, во рамките на реформите на Марија Терезија, па сè до распадот на Југославија кон крајот на XX век.

„Исцелување на светот“ е добитник на наградите „Меша Селимовиќ“, „Мирко Ковач“, „Радомир Константиновиќ“, „Кочиќево перо“ и „roman@tportal.hr – награда за најдобар хрватски роман“!   

Книгата е објавена со поддршка на Министерството за култура на Република Хрватска и Министерството за култура на Република Македонија.

Слободан Шнајдер (Загреб, 1948) дипломирал чиста филозофија и англистика на загрепскиот Филозофски факултет. Што се однесува на филозофијата во времето на студирање на Шнајдер, овој факултет е одбележан од придонесите на Праксисовата школа; исто така, во голем степен и од студентскиот бунт од 1968 година.

Шнајдер објавува од средношколски денови. Првата професионална изведба му е текстот „Миниголф“ (1968). Некои од неговите драми се: „Камов, смртопис“ (1978), „Хрватски Фауст“ (1982), „Хрватски Фауст, трагедии втор дел“ (2018), „Confiteor“  (1984), „Баухаус“ (1990), „Змиска кожичка“ (1995), „Невеста од ветер“ (1998), „Петто евангелие“ (2004), „Енциклопедија на загубеното време“ (2012), „Светкање на кометата“ (2015). Шнајдер е изведуван речиси во сите земји од поранешната државна заедница, што хрватскиот културен и политички естаблишмент од почетокот на деведесеттите години до денес го смета за хендикеп. Избраните дела во девет книги му имаат излезено во издание на „Прометеј“ (Загреб 2005-2007).

Книги проза: „Книга за ситното“ (1996), „505 со црта“ (раскази, 2007), романи: „Морендо“ (2011), „Исцелување на светот“ (прво издание на „ТИМпрес“ 2016, трето дополнето 2018). Романот има добиено пет награди, главно регионални: „Меша Селимовиќ“, „Мирко Ковач“, наградата на „tportal“, „Кочиќево перо“, „Радомир Константиновиќ“. 

Во 1987 година Владимир Милчин во Народниот театар во Битола ја има режирано драмата „Думански тишини“ од Шнајдер, а Бранко Брезовац во истиот театар во 2007 година ја има режирано „Коски во камен – Тито“.

Јелена Лужина во „Блесок“, Скопје 2011, има објавено избор од драмите на Шнајдер во сопствен превод, насловен „Хрватски Фауст и други драми“.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!