Корисничка поддршка:
Македонски English

ЈЕЛА КРЕЧИЧ И СЛАВОЈ ЖИЖЕК ВО СКОПЈЕ И МАКЕДОНИЈА ЗА ПРВПАТ ВО ЖИВОТОТ

by Kristina Velevska | No comments yet. | 39 views on this post

„Антолог“ открива

ЈЕЛА КРЕЧИЧ И СЛАВОЈ ЖИЖЕК ВО СКОПЈЕ И МАКЕДОНИЈА ЗА ПРВПАТ ВО ЖИВОТОТ

 

28 октомври 2017, Скопје –  Организацискиот тим на Фестивалот на европската книжевност „BookStar“ со големо задоволство соопштува дека вчера попладне во Скопје за првпат во животот пристигнаа словенечката писателка и новинарка Јела Кречич и нејзиниот сопруг, култниот философ Славој Жижек. Ситуацијата е малку необична. Светскипознатиот и реномиран философ и критичар на културата кого го нарекуваат „еден од најпознатите интелектуалци на светот“, овој пат не е ѕвездата, туку неговата сопруга. Славој доаѓа во Скопје после свое претставување во Русија, но во приватна придужба на Јела, чиј роман „Нема друга“, во издание на „Антолог“ и во превод на Драгана Евтимова ќе се промовира вечерва со почеток во 20 часот, во Клуб ресторанот МКЦ. Книгата е објавена со поддршка на програмата Креативна Европа на Европската Унија.

Оваа иронична комедија за 21 век ќе ја промовира новинарката и литературна критичарка Илина Јакимовска

„Нема друга“ е оригинална и комична приказна за сложените човекови односи во современите времиња. По разделбата со долгогодишната девојка, Матјаж паѓа во тешка депресија. Но, по некое време, донесува одлука дека патот до нејзиното срце води преку друга врска. Односно врски. Но планот излегува позамрсен од тоа што очекувал. Тој тргнува на одисеја од „мувања“ на една вечер со редица девојки по познати места во Љубљана, но и од поранешна Југославија. Средбите и жените се најразлични, но Матјаж секогаш доаѓа до истиот заклучок: дека нема друга како бившата. Кречич создала метафора на љубовта во денешното општество, но и урнек на прикриен женомразец типичен за новиот милениум, кој ни го ставила на тацна.

Славој Жижек, за процесот на пишување на книгата од неговата трета сопруга има изјавено: „Морам да признаам дека ‘Нема друга’ ме преплаши. Јас сум жртвата при пишувањето на оваа книга. Сега зборувам како претставник на работничката класа. Додека жена ми ја пишуваше својата книга во вечерните часови, јас имав други задачи: јас морав да цедам портокали за да има свеж сок, да ги мијам садовите, да правам чај и така натаму и така натаму...“

Кречич во својот роман прави карикатура на современите љубовни врски и прецизна скица на недоветниот љубовник на 21 век. Преку алтернативниот и ноќниот живот во Љубљана, Метелкова, лесните пороци и кратките врски, Јела Кречич низ дијалозите ги отвора и најголемите култоролошки феномени на современото општество: борбата меѓу идеологиите, консумеризмот, „њу ејџ“ филозофијата, капитализмот, религијата, атеизмот, феминизмот и слободата на говорот, за на крајот сето тоа да биде насочено кон латентниот шовинизам, кој е присутен насекаде.

Ова е одлична балканска трагикомедија што го зближува јазот помеѓу современоста и традицијата на овие простори.

Саркастична, критична и со остар стил на пишување, оваа новинарка, колумнистка и филозофка дипломирала на тема уметничките манифести во словенечката авангарда. Докторирала философија. Пишува за најголемиот весник во Словенија, „Дело“, каде што во 2013 година на словенечки и на англиски јазик објавува ексклузивно интервју со Џулијан Асанж, што ја прави меѓународно позната личност. Истата година стапува во брак со влијателниот философ Славој Жижек.

На 28 октомври во 11 часот во Книжарницата „Антолог“ (ул. „Димитрие Чуповски“ бр. 31) ќе се одржи и средба, „упанишад“, со Јела Кречич, на која читателите ќе имаат можност да ја запознаат оваа авторка одблиску.

Следен фестивалски ден е 30 октомври кога ќе се одржат два специјални настани во Кино Култура. Во 20 часот ќе започне книжевната маса „Hold Me, Thrill Me, Kiss Me, Kill Me“ на тема „ограничувањата и предностите на жанровската литература“, а од 21 часот проекции на филмови од Милчо Манчевски.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!