Корисничка поддршка:
Македонски English

МАКЕДОНСКА ПОДДРШКА – ПОЕТЕСАТА ШТО УМЕЕ ДА ГИ ОВЕКОВЕЧИ ВРЕДНИТЕ МИГОВИ

by Kristina Velevska | No comments yet. | 20 views on this post

„Антолог“ најавува

МАКЕДОНСКА ПОДДРШКА – ПОЕТЕСАТА ШТО УМЕЕ ДА ГИ ОВЕКОВЕЧИ ВРЕДНИТЕ МИГОВИ

 

26 октомври 2017, Скопје –  Организацискиот тим на Фестивалот на европската книжевност „BookStar“ со големо задоволство ја најавува промоцијата на четвртата поетска збирка на македонската писателка Снежана Стојчевска, како дел од програмата „Македонска поддршка“. Денеска, 26 октомври 2017 година, со почеток во 20 часот, во Клуб ресторанот МКЦ ќе биде промовирана нејзината книга „Треба да е лесно“.

Книгата ќе ја промовираат  Ана Голејшка, Јосип Коцев и Славица П. Диневска, кои исто така и ќе интерпретираат стихови од неа.

Најновиот поетски ракопис на Снежана Стојчевска, уште со насловот – „Треба да е лесно“ на ефектен начин асоцира на нејзината препознатлива поетика, во која се потврдува начелото на Р. Тагоре дека за убавите песни имаме чувство дека ние сме ги напишале. Поетската интуиција на Снежана Стојчевска ја опева трансформативната моќ на љубовта: токму кога вистински и интензивно се љуби, светот станува убаво место за живеење.

„Најновиот поетски ракопис на Снежана Стојчевска е силно сведоштво дека таа умее непосредно и неусилено да ги ’(пре)сретне‘ и да ги овековечи поетски вредните мигови, како, на пример, длабоко доживеаното екстатично сознание дека Светот е убав. / Убави сме и ние во него. Вредноста на оваа поезија, меѓу другото, е во тоа што во неа вешто се опеваат и се слават токму миговите за кои вреди да се живее“, се вели во рецензијата на Владимир Мартиновски кон книгата.

Снежана Стојчевска е родена во 1980 година во Скопје. Дипломира на Институтот за педагогија при Филозофскиот факултет во Скопје. Веќе девет години работи во „Квазар филм“ како координатор на продукција. Во 2012 година ја објавува првата поетска книга „Шеќер по подот“ во издание на „ИЛИ-ИЛИ“, како дел од едицијата „Русалки“, во која се јавува како уредник. „Под нулата“ е нејзиното второ дело, за кое ја добива наградата „Бели мугри“ за 2013 година, која ја доделува Домот на културата „Кочо Рацин“ од Скопје. Во 2015 година ја објави третата поетска книга „Модри фантазии“ во издание на издавачката куќа „Темплум“. Застапена е во повеќе антологии на младата македонска поезија, како и во антологијата на албански јазик „Гласот на водата“ во склоп на Меѓународниот поетски фестивал „Деновите на Наим“ во 2015 година. Во 2016 година настапува на Меѓународна книжевна средба во Велење, Словенија, каде што е објавена во антологијата на словенечки јазик „Фестивална антологија на изворна и преведена европска поезија на 21-виот век“. Настапувала на повеќе поетски фестивали во земјава и во странство.

Читателите денес повторно ќе имаат шанса да го запознаат и авторот Илја Леонард-Фејфер во рамките на програмската активност „На Кафе со“ во Книжарницата „Антолог“ на ул. „Димитрие Чуповски“  бр. 31, со почеток во 11 часот, кога ќе се одржи средба на која тој ќе потпишува книги и ќе разговара со своите читатели.

Во текот на утрешниот ден, 27 октомври, на скопскиот аеродром се очекува и пристигнувањето на брачниот пар Јела Кречич–Славој Жижек, за што повеќе информации ќе споделиме дополнително.

 

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!