Корисничка поддршка:
Македонски English

ПРОМОЦИЈА НА РОМАНОТ „ЉУБОВ НА ДВА КОНТИНЕНТА“ ОД МАРИЈА БАБАМОВА

by Kristina Velevska | No comments yet. | 289 views on this post

Утре во Книжарницата „Антолог“

ПРОМОЦИЈА НА РОМАНОТ „ЉУБОВ НА ДВА КОНТИНЕНТА“ ОД МАРИЈА БАБАМОВА

 

26 септември 2017, Скопје – Издавачката куќа „Антолог“ од Скопје со големо задоволство ја најавува промоцијата на Љубов на два континента, најновиот роман на авторката Марија Бабамова. Промоцијата  ќе се одржи утре, 27 септември 2017 година, во Книжарница „Антолог“ (ул. „Димитрие Чуповски“ бр. 31), со почеток во 12 часот. Промоторка на книгата ќе биде рецензентката Билјана Стевковска-Савиќ.

                                                                                      

Љубов на два континента е едноставен роман, лесен за читање, проткаен со многу емоции. Во него авторката со лирска нота, на моменти многу суптилна или нежно мека, силно изразена со боите на искрените чувства, го одразува денешното живеење и го држи читателот љубопитно да го следи дејството. Главен лајтмотив на овој роман е сепак љубовта, како животен резонанс, изразена најмногу како љубов меѓу двајца вљубени, или искрена љубов кон децата, до исконска љубов кон родната Македонија. Многу автентично, со особена колоритност авторката ги опишува кејот на Вардар, Водно, Охрид, Маврово, Радика...

Авторката Марија Бабамова во овој роман се служи и со доста метафори, оставајќи простор на читателот да се поистоветува со напишаното или да ја открие вистинската мисла на авторот. Највпечатлива е метафората со црешата, која во дел од дејството е вистинска цреша – дрво, но кога се работи за носталгично-емотивните доживувања, таа цреша е Македонија. Целиот роман претставува богатство од поетски споредби, топли доживувања, искрена симболика, логичка последователност на настаните. Севкупната содржина е судбинска лирска исповед, искрена, исткаена и облагородена со тајните на животната сензибилност.

Марија Бабамова е родена во Кочани во 1949 година. Основното образование го започнува во Скопје. Уште во најраното детство, во основното училиште пишува поезија и проза за деца, кои ги објавува во списанијата „Колибри“, „Наш свет“, „Другарче“, „Развигор“ и други. Во средношколските и во студентските денови пишува поезија и повремено објавува во весниците „Млад борец“ и „Студентски збор“. Успешно ги завршува студиите по фармација и посветувајќи се на професијата објавува стручни трудови во списанијата „Фармацевтски информатор“, „Лекар“ и други. Во поново време објавува текстови во детското списание „Росица“. Понесена од емотивна инспирација, се пронаоѓа во пишувањето детска поезија и проза. Издава збирка песни за деца Пеперутки и збирки раскази Ирина, Магнолии, Ирина балерина, Верверички, како и поезија за возрасни Носталгија, Младешки опој. Романот Љубов на два континента е нејзината најнова книга.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!