Корисничка поддршка:
Македонски English

ОБЈАВЕН РОМАНОТ „ПОМЕЃУ РАЈОТ И ПЕКОЛОТ“ ОД ЈОН КАЛМАН СТЕФАНСОН

by Kristina Velevska | No comments yet. | 176 views on this post

„Антолог“ најавува

ОБЈАВЕНА БЕЗВРЕМЕНСКАТА ИСЛАНДСКА САГА „ПОМЕЃУ РАЈОТ И ПЕКОЛОТ“

 

18 септември 2017, Скопје – Издавачката куќа „Антолог“ од Скопје со огромно задоволство го најавува објавувањето на романот „Помеѓу рајот и пеколот“ од меѓународно наградуваниот исландски писател Јон Калман Стефансон. Романот е добитник на високата шведска книжевна награда што го носи името на Пер Улов Енквист во 2011 година. Преводот на македонски е на Ѓурѓица Илиева.

                                                                                

Во еден далечен предел на Исланд, млад човек се придружува на брод со рибари. Кога ќе ги фати бура на отворено море и неговиот најдобар пријател ќе погине, тој е збунет од студената рамнодушност на неговите колеги. Скршен поради тоа, скришно ги напушта, со една единствена цел, да ја врати книгата на слепиот стар морски капетан што живее зад гори и планини. Штом ќе пристигне во градот, открива дека не е сам во својата самотија: пречекан е во топлиот круг на маргиналците, каде што почнува да го гледа животот со други очи.

„Помеѓу рајот и пеколот“ ги истражува длабочините на очајот за да ја прослави спасителната моќ на пријателството. Сместен на крајот од XX век, овој роман нуди читателско искуство што е толку интензивно како и силата на исландските пејзажи.  

Фалбите што ги добива авторот за ова дело не се претерани: оваа фасцинантна приказна за Исланд и за неговото минато е безвремена одисеја, лирска медитација за животот и смртта, за рајот и пеколот што ги носиме во себе. „Извонредно... како длабокиот здив на живот да допира од морските длабочини“, се вели во критиката кон романот на престижното списание „Le Monde“.

Романот е прв дел од „Трилогијата за момчето“, која ги содржи уште и „Тагата на ангелите“ и „Срцето на човекот“ и според која наскоро ќе биде снимен и филм. Запрашан што го инспирирало да ги напише овие три романи, Стефансон ја споменал првата посета на прекрасниот пејзаж на западните исландски фјордови. „Како планините да ме прашуваа: ’Зошто не пишуваш за нас?‘“, додал тој.

Книгата е објавена со поддршка на Исландската книжевна фондација.

Јон Калман Стефансон (1963) е исландски писател. Студирал литература, но не положил некој важен испит и не го завршил факултетот. Од 1992 до 1995 година работел најразлични работи во Копенхаген, Данска. По враќањето на Исланд, почнува да се занимава со пишување. Како поет, романсиер, преведувач, тој е еден од најистакнатите современи исландски писатели. Неговите дела се преведени на десетина јазици.

Книгата е достапна и во новоотворената книжарница на „Антолог“ на ул. „Димитрие Чуповски“ бр. 31.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!