Корисничка поддршка:
Македонски English

ОБЈАВЕН РОМАНОТ „ЖЕНАТА ВО КАФЕЗОТ“ ОД ЈУСИ АДЛЕР-ОЛСЕН

by Kristina Velevska | No comments yet. | 31 views on this post

„Антолог“ го објави

„ЖЕНАТА ВО КАФЕЗОТ“ – ВИСТИНСКИ ИЗБОР ЗА ЉУБИТЕЛИТЕ НА СКАНДИНАВСКИТЕ ТРИЛЕРИ

 

15 август 2017, Скопје – Издавачката куќа „Антолог“ од Скопје со огромно задоволство го најавува објавувањето на романот „Жената во кафезот“ од еден од најценетите скандинавски автори на трилер-романи, данскиот писател Јуси Адлер-Олсен. Романот се искачил на првото место на сите топ-листи уште веднаш по објавувањето и се задржал на врвот на бестселери цела година, а според него е снимен и филм. Преводот на македонски е на Лара Крстева-Ичокаева.

                                                                               

Прогонувана. Киднапирана. Но достоинствена. И борбена. Гребе со ноктите по голите ѕидови на просторијата во која е заробена додека прстите не почнат да ѝ крвават. Нема начин да одреди колку е часот или кој ден е, па неделите и месеците минуваат како на бескрајна лента. Прикриениот глас во темнината е груб и немилосрден. Вели дека сето тоа ќе престане кога ќе му одговори на едно едноставно прашање...

Детективот Карл Морк се враќа на работа по подолго отсуство поради престрелка во која едниот од неговите колеги останува парализиран, а другиот е убиен. Карл се обвинува себеси, а колегите почнуваат да го избегнуваат. Шефот го преместува во новоформираниот сектор за нерешени случаи надвор од Копенхаген, наречен секторот Q. Како единствен вработен во овој сектор му е назначен сирискиот имигрант Асад, кој всушност е чувар, но се покажува како талентиран и надарен детектив.  

Карл одново ја започнува истрагата за случајот со исчезнатата млада политичарка Мерете Лингор. Таа исчезнала пред пет години и се претпоставува дека е удавена, но нејзиното тело никогаш не е пронајдено. Карл смета дека нешто е пропуштено во истрагата. Навистина, Мерете не е мртва. Сè уште не!

Книгата е објавена со поддршка на програмата Креативна Европа на Европската Унија.

Јуси Адлер-Олсен (1950) е еден од најпопуларните и најчитани дански писатели. Во младоста свирел гитара во неколку поп-групи. Студирал медицина, социологија, филм. Бил издавач, уредник, композитор на филмска музика и продавач на книги. Неговите романи се објавени на 40 јазици и станале бестселери во многу земји. Добитник е на огромен број награди, а четири негови книги имаат и филмски адаптации.

 

Лара Крстева-Ичокаева е родена во 1971 година во Скопје. Завршила гимназија во Еснес, Данска. Дипломирала германски и француски јазик и литература во Загреб, Хрватска. Магистрирала во Женева, Швајцарија, на тема од областа на современата француска литература. Има мастер и од деловно право. Работи како раководител на Германската стопанска комора во Република Македонија. Преведува од дански, германски, француски, српски и од хрватски јазик.

Comments (0)

Напиши коменатар

Вашето име:


Рангирање: Лошо           Добро

Внесете го кодот од сликата долу:




Вашиот коментар: Забелешка: HTML is not translated!